雖然日本係香港人嘅旅遊熱點，但「移民日本」感覺好似好陌生，其實係關乎到日本嘅移民政策比其他國家門檻更高，近乎係「半鎖國」嘅狀態。如果有興趣移民日本，想有懶人包知多少少呢方面嘅資料，就一齊嚟睇吓高生嘅「移民日本三步曲」啦！
移民日本三步曲（一）：取得長期居留簽證（在留）
1. 技術．人文知識．國際業務簽證
呢項簽證簡稱為「技人國」，期限分為五年、三年、一年、半年及三個月，涵蓋多個工種，係目前最多外國人申請嘅日本工作簽證。日本當局會按照申請人及申請人任職嘅公司決定簽證限期，而持技人國簽證嘅配偶及子女就可以以家人身份申請「永住者的配偶簽證」及其他種類嘅親屬簽證留居於日本。申請人需要與日本嘅公營機構或民間企業締結與工作相關嘅合約，例如僱傭合約、派遣勞動契約或業務委託合約等，上面需註明工作內容、薪金、福利等細節，相關待遇唔可以低於日本員工擁有嘅技能及知識，換句話說，即係要證明聘請您嘅獨特性及必要性。而公司條件亦同獲批成功率成正比，規模越大、營業額越高等，簽證獲批嘅機會都越大。申請人喺日本居住滿十年以上並滿足一定條件，就可以申請永住權。
2. 高度人才簽證
為咗吸引傑出嘅外國人才到當地生活及帶動經濟，唔少地方都會設有專才計劃，日本都唔例外。只要申請人喺「外國高度人才配點表」取得 70 分或以上，就可以透過該項簽證得到在留資格。不過要留意嘅係，配點表嘅分數制度分為學術研究、專門技術、經營管理三種，得分項目各有不同，除咗學歷、工作經驗、年均收入及年齡四方面，其他範疇嘅分數係唔能夠互通嘅。另外，申請人最低年收入必須達300萬日元以上。該項簽證嘅在留資格分為1號同2號，高級人才簽證1號喺日本逗留三年後，可以駁落去申請高級人才簽證2號；而如果您係高材生，喺取得高級人才簽證及於日本居住一年後，分數仍然有80分以上，就可以直接申請永住權㗎喇。
3. 經營管理簽證
唔似其他移民熱點，日本並冇開設正式嘅投資移民計劃，唯一一個有投資成份嘅途徑，就係「經營管理簽證」，簡單嚟講，即係喺日本成立及經營管理一間規模相當於上市公司嘅企業。有意透過呢個途徑移居日本嘅申請者，可以先申請「經營管理簽證（4個月）」前往日本，辦理公司註冊手續，等公司成立之後，再將經營管理簽證更新為一年；如果係打算以東京為公司根據地，就可以直接申請「東京都創業人才引進簽證（6個月）」，外國投資者可以親自前往東京創業，係開設公司最快嘅方式。申請人需年滿20歲或以上、公司僱用兩名以上員工、投資金額達500萬日圓（包括於日本創業／收購日本公司／擔任日本公司社長） 及喺日本有明確固定嘅公司地址。每次簽證期為一年，只要申請人冇不良記錄、公司運營正常及收入可支持留日生活，就可以繼續續簽。
4. 配偶簽證
如果您嘅配偶係日本公民，您就可以申請配偶簽證，為期三年，而當中喺日本居住滿一年以上嘅話，就可以取得永住權；如果您係打算入藉，就必須喺日本住滿三年以上喇。
移民日本三步曲（二）：取得永久居留（永住權/永久簽證）
唔同簽證會有唔同嘅簽證期限及續簽條件，喺完成上一步之後，就可以繼續申請永住簽證喇。 申請條件： 1. 申請人品行優良 2. 在日期間無觸犯日本法律 3. 具有足夠資產或技能水平 4. 唔會危害公共衛生 5. 連續居住日本十年以上，當中五年必須以就勞簽證或居住簽證居留日本 6. 冇連續離境日本三個月，一年之內冇離境日本超過共半年 - 如為日本永住者嘅父母，則須喺日本居滿 5 年 - 如為日本永住者嘅配偶，並結婚三年以上，則須喺日本居滿一年 - 如為日本永住者嘅子女，則須喺日本居滿一年
移民日本三步曲（三）：入籍日本
最後一步，亦即係日本所講嘅「歸化」，成為日本公民。根據日本法務院嘅說明，歸化嘅條件總共有六項： 1. 合法居住喺日本五年以上 2. 年滿18歲（2022年4月1日開始） 3. 無犯罪紀錄、按時納稅、唔會對日本社會造成麻煩 4. 有謀生能力或足夠資產，能夠應付喺日本長期生活 5. 必須放棄原有國藉 6. 唔可以加入或成立任何企圖以暴力破壞日本政府嘅團體
初步了解完移民日本嘅程序之後，可能都會覺得比起其他地方，好似好複雜同好難觸摸咁，不過高生認為門檻高定低都好，最緊要嘅係要知道目的地適唔適合自己，如果對方真係您心儀嘅對象，相信關關難過都會關關過！
想知道更多關於搬屋/搬office嘅資訊？記得留意我哋嘅Facebook同Instagram啦！ ------- 高永搬屋官方網站：http://bit.ly/32HNqeO 高永搬屋instagram：http://bit.ly/2V0dlwx 線上報價/查詢：http://bit.ly/goingmoving / +852 5595 7455 (Whatsapp)
Comments